HATAW! D'yaryo ng Bayan hatawtabloid.com
HINDI lang nagwagi kundi kampeon ang beterano at United States chess master na si Florentino Inumerable sa 2025 Illinois Senior State Chess Championships na ginanap noong 25-27 Abril 2025 sa Holiday Inn Chicago North Shore sa Evanston, Illinois, USA.
Natapos ng taga-Balayan, Batangas na si Inumerable ang limang-round Swiss system competition na may 4.0 puntos mula sa tatlong panalo at dalawang tabla, pareho sa puntos ng kapwa Filipino na si FIDE Master Camilo Pangan at Candidate Master Glen Gratz.
Matapos ang tie break points, si Inumerable ang nagkampeon, si Pangan ang pumangalawa, at si Gratz ang pumangatlo.
Tinalo ng nakabase sa Chicago, Illinois na si Inumerable si Bill Smythe sa unang round at si James Abbott sa ikalawang round.
Tabla siya kay Gratz sa ikatlong round, tinalo si Steven J. Szpisjak sa ikaapat na round, at tabla kay Pangan sa ikalima at huling round.
Binabati ng dating Illinois State Senior Champion na si International Master Angelo Abundo Young ang kanyang dating kasamahan sa koponan na mga Pinoy (Inumerable at Pangan), na kumakatawan sa Chicago Midwest team noon.
“Si Flor (Florentino Inumerable) gaya ng tawag sa kanya ng kanyang mga kaibigan, ay isang peso champion at isa sa mga highlight ng kanyang karera ang pagtalo kay International Master Georgi Orlov sa isang klasikal na estilo,” paggunita ni IM Young, head coach ng Emilio Aguinaldo College, Manila Campus. (MARLON BERNARDINO)
