HATAW! D'yaryo ng Bayan hatawtabloid.com
ALAM MO NA!
ni Nonie Nicasio
BUMISITA at nagbigay kortesiya ang grupo ng Quezon City Parents-Teachers Association (QCPTA) sa tanggapan ni Movie and Television Review and Classification Board (MTRCB) Chairperson at CEO Lala Sotto-Antonio nitong Lunes, Abril 29, upang talakayin ang posibleng kolaborasyon para sa responsableng panonood.
Sa kanilang dayalogo, nagpahayag ng interes ang QCPTA sa pagsasagawa ng mga serye ng “Responsableng Panonood” seminars, ang pangunahing programa ng MTRCB na idinisenyo para tulungan ang mga magulang na magabayan ang mga bata sa paggamit ng media at maintindihan ang kahalagahan ng angkop na content.
Napag-usapan din ang posibilidad ng pagpapalabas ng mga klasikong pelikula sa mga estudyante ng Lungsod Quezon.
Planong isagawa ang mga ito sa iba’t ibang distrito ng Lungsod Quezon, sa pakikipagtulungan ng mga lokal na paaralan.
Binigyang-diin ni Sotto-Antonio ang kahalagahan ng pagpapalakas ng kaalaman ng mga magulang at nakatatanda sa responsableng paggabay sa mga kabataan lalo na’t malawak na ang paggamit ng media sa ating panahon.
“Malaki ang impluwensiya ng media sa paghubog ng pag-uugali ng ating mga kabataan. Sa pamamagitan ng kolaborasyon ng MTRCB at QCPTA, nais nating maipabatid na ang responsableng panonood ay nagsisimula sa tahanan at mapapalawak pa hanggang sa mga komunidad,” pahayag ni Sotto-Antonio.
Nagpasalamat ang QCPTA sa MTRCB dahil sa mga programa nito na posibleng makapagpatibay sa relasyon ng bawat pamilyang Filipino at maiangat ang kamalayan ng mga magulang, guro at estudyante pagdating sa mga klasikong pelikula.
Patuloy na tinitiyak ng MTRCB ang mas pinalakas pang pagsusulong ng “Responsableng Panonood” bilang misyon ng ahensiya na maseguro ang isang ligtas at masayang panood ng pamilyang Filipino.
