HATAW! D'yaryo ng Bayan hatawtabloid.com
HATAW news Team
HINDI bababa sa 12 katao ang naiulat na binawian n buhay habang 28 indibiduwal ang sugatan sa banggaang kinasasangkutan ng limang sasakyan sa SCTEX Toll Plaza, sa lungsod ng Tarlac, nitong Huwebes ng hapon, 1 Mayo.
Ayon kay P/Lt. Col. Romel Santos, director ng Tarlac PPO, naganap ang insidente sa SCTEX toll plaza, sa bahagi ng Brgy. Pantog, sa nabanggit na lungsod, dakong 12:30 ng hapon na kinasanguktan ng isang Toyota Veloz na minamaneho ni Carlo Mojica, residente sa San Fernando, Pampanga; isang 18-wheeler truck na minamaneho ni Darwin Cruel ng Tondo, Maynila; isang Nissan Urvan; isang Kia Sonet; at isang bus ng Solid North Transit, may plakang UVK-941, minamanehi ni Teodoro Merjan ng Lingayen, Pangasinan.
Ani P/Col. Santos, inararo ng bus ng Solid North Transit Inc., ang apat na sasakyan na nakapila sa toll plaza para sa pagbabayad ng toll fee
Kasalukuyan nang nasa kustodiya ng pulisya ang driver ng bus na napag-alamang nakatulog kaya nawalan ng kontrol sa pag-andar ng sasakyan.
Ayon kay Tarlac PDRRMO chief Marvin Guiang, anim sa 12 namatay ay pawang mga bata.
Iniulat ng Philippine Red Cross (PRC) ang insidente matapos makakuha ng kompirmasyon mula sa Tarlac Provincial Hospital.
Dagdag ng ahensiya, tinatayayang 43 kilometro ang layo ng pinangyarihan ng insidente o isang oras lamang mula sa PRC Tarlac Chapter.
Dinala sa Tarlac Provincial Hospital ang lahat ng sugatang biktima sa insidente.
Isinusulat ang balitang ito’y patuloy ang PDRRMO Tarlac sa kanilang operasyong mailabas ang mga biktimang naipit sa loob ng mga sasakyan.
