Chinese spy suspect nasakote malapit sa Comelec Intramuros

ISANG pinaghihinalaang Chinese spy ang naaresto ng National Bureau of Investigation (NBI), na nakuhaan ng ‘spy equipment’ sa loob ng sasakyan na nakaparada malapit sa punong tanggapan ng Commission on Elections (Comelec) sa Intramuros, Maynila, kahapon ng hapon, Martes, 29 Abril.

Ayon kay NBI spokesperson Ferdinand Lavin, pinag-aaralan ang kasong paglabag sa Espionage Law at Data Privacy Act si Tak Hoi Lap kaugnay ng Cybercrime Law.

Nakuha sa kanyang sasakyan ang isang International Mobile ­Subscriber Identity (IMSI) catcher na gamit sa paniniktik o eavesdropping at pag-intercept ng mga mobile phone pati na rin ang pagsubaybay sa mga datos at lokasyon ng mga gumagamit ng mobile phone.

Sinabi ni Lavin, matagal nang inoobserbahan sa lugar ang sasakyan ni Lap na unang na-monitor na umiikot sa Taguig at Makati City.

Hindi inaalis ni Lavin ang posibilidad na magamit ang nasabing equipment sa midterm elections, kaugnay sa hinalang panghihimasok ng China sa halalan ng bansa.

Nagsasagawa ng inventory ang National Bureau of Investigation-National Capital Region (NBI-NCR) kaugnay nito.

Inilagak sa NBI-National Capital Region (NBI-NCR) office ang suspek at ang mga nasamsam na ebidensiya kabilang ang spy equipment para magsasagawa ng pagsusuri ukol dito.