HATAW! D'yaryo ng Bayan hatawtabloid.com
KITANG-KITA KO
ni Danny Vibas
NAG-AAMBISYON pala si Robin Padilla na maging governor ng Camarines Norte (na balwarte ng mga Villafuerte), pero napag-alaman n’yang P150-M ang kailangang budget ng isang kandidato para sa ganoong posisyon para makatiyak ng panalo kaya’t biglang nagbago ang isip n’ya.
Akala n’ya ay P10-M–P20-M lang ang kailangan niyang budget sa kampanya at makakaya na n’yang malikom ‘yon sa iba’t ibang paraan–kabilang na ang pagbebenta ng ari-arian nila ng misis n’yang si Mariel Rodriguez at pangungutang sa mga tao na malaki ang pagtitiwala sa kanilang mag-asawa.
Mahabang lahad ng aktor sa interbyu sa kanya ng asawang si Mariel para sa YouTube channel nito: “Nagparehistro pa nga ako sa Bicol kasi ang nasa isip ko, P10-M, P20-M , siguro kaya naman utang-utangin ‘yon.
“Twenty million, mayroon ka naman naitago, hindi naman ako naniniwala na ginastos mo lahat.
“Sinabi sa akin, P150-M [ang kailangan] sa local government, governor.’ Yun pa raw ang pinakamaliit.
“Sabi ko, ‘Teka muna!’ Ibig mong sabihin, kung magbebenta ka ng ari-arian para pondohan ‘yung pagkandidato na ‘yon, sabihin na natin na nanalo ka…”
May dugtong pa sana ang analysis ni Robin pero si Mariel na ang nagsalita.
Sundot ng dating It’s Showtime host: “Ako na ang magsasabi. Ang mangyayari, mapipilitan ka talagang maging corrupt kasi babawiin ‘yung bahay.
“Alangang pumayag na lang ako, ibinenta natin ‘yung mga ari-arian natin, tapos nawala na lahat dahil ikinampanya natin. O ‘di ba, siyempre kailangan bumalik ‘yon.
“Doon ngayon papasok ‘yung corruption!”
Dahil hindi na matutuloy ang pagkakandidato ni Robin sa Camarines Norte, humingi ng paumanhin si Robin sa mga kababayan na umasang tatakbo siya sa eleksiyon sa susunod na taon.
Saad niya, “Hindi tama, so nagdesisyon na ako.
“Kaya sa mga kababayan po natin sa Camarines Norte, patawarin niyo po ako na hindi ko po kaya.
“Kung gusto ko pong magdala ng pagbabago sa inyo, dapat, umpisa pa lang. Pagpasok ko pa lang, pagbabago na kaagad.
“Hindi ‘yung mangangako ako, ganito, ganito, ganito, bola ‘yon.”
Sinamantala naman ni Mariel ang pagkakataon para linawin sa lahat na mali ang akala na inuubos niya ang pera ng kanyang asawa.
Giit ni Mariel, “I-clear natin sa kanila na ‘yung pera ko, pera ko. ‘Yung pera mo, pera mo.
“Pero siya [Robin] ang nagbibigay ng para sa amin dito sa bahay.
“Pero ‘yung mga luho ko, lahat ng mga damit na binibili ko na mamahalin sa mga anak ko. But anything luxury, anything out of the necessity, sa akin ‘yon galing.
“Kasi minsan, sinasabi nila, baka inuubos ko raw ‘yung pera mo.
“Itong mga kalokohan ko, akin ‘yon ‘no! Hello!”
