HATAW! D'yaryo ng Bayan hatawtabloid.com
TINATAYANG nasa P17-milyong halaga ng mga tabletang ecstacy na itinuturing na imported drugs ang nasamsam ng mga awtoridad sa ikinasang controlled delivery entrapment operation ng pinagsanib na puwersa ng PDEA Region 4-A at Region 3, BoC Clark, DEU3, at Lubao PNP sa pamumuno ni P/Lt. Col. Michael John Riego, noong Sabado ng gabi, 8 Agosto.
Arestado ang mga suspek na kinilalang sina Katrina Legaspi, 36, alyas Charmaine Valencia Bacani; Joshua Bautista, 20, hairdresser; Raphy Serrano, 30; pawang mga tagabayan ng Guagua, lalawigan ng Pampanga; William Manansala, 41; at Patrick Pangan, 35, kapwa mula sa bayan ng Lubao, sa naturang lalawigan.
Nagmula ang mga kontrabando sa The Netherlands na ipinadala ng isang Daniel Edmond Bruce sa dalawang consignee na si Legaspi, nadakip sa harapan ng Morzan Hardware; at Bautista na nasakote sa harapan ng Petron gasoline station sa San Roque Dau 1st, sa bayan ng Lubao, lalawigan ng Pampanga.
Kasalukuyang nasa PDEA 3 custodial facility ang mga nadakip na suspek habang inihahanda ang kaukulang kasong paglabag sa RA 9165 na isasampa laban sa kanila.
(RAUL SUSCANO)
