Eksplosibo ‘napulot’ ng rider

NATAGPUAN ng isang motorcycle rider ang anim na ikinokonsiderang ‘explosives’ o bala para sa grenade launcher habang patungo sa pinapasukang construction site, sa barangay Napindan, Taguig City, linggo ng hapon.

Base sa inilabas na ulat kahapon ng National Capital Region Police Office (NCRPO), natukoy na ang anim na M203 ammunition ay para sa Grenade Launcher na iniwan sa gilid ng kalye na nakasilid sa isang pouch bag na tela.

Habang patungo sa Toyo Construction Site dakong 5:50 pm nitong Linggo,  26 Hulyo, ang security guard na si James Demafelis, 40 anyos, ng Kalawan, Pasig City, napansin ang green pouch bag kaya hinintuan at inalam ang nasa loob.

Nakita niya ang pampasabog kaya agad ipagbigay-alam sa Napindan Maritime Police Precinct na nasa loob ng compound ng Toyo Construction Site.

Naipasa ang naturang explosives sa Explosive Ordnance Division ng Taguig Police para sa safekeeping at proper disposition. (JAJA GARCIA)