Bike rider utas sa HPG

PATAY ang hinuling bike rider sa traffic insident, makaraan barilin ang mga tauhan ng PNP-HPG nang lumaban at tangkang agawin ang baril ng isang pulis sa loob ng mobile car sa Makati City kahapon ng umaga.

Kinilala ang biktimang si John Dela Riarte, 27, may apat tama ng bala ng baril sa dibdib, leeg at baywang.

Base sa inisyal na ulat ng pulisya, pasado 9:00 am sakay si Dela Riarte ng kanyang bisikleta patungo sa kanyang trabaho nang biglang bumangga sa isang kotse sa southbound lane sa EDSA-Estrella, Makati City.

Agad nagresponde sa lugar sina PO2 Jonjie Manon-og at PO3 Jeremiah De Villa kasama ang tatlong MMDA traffic enforcers at naabutan si Dela Riarte na hinahampas ng helmet ang nakabanggaang kotse.

Sinasabing hindi tumitigil sa pagwawala ang biktima kaya pinosasan at isinakay ng mga awtoridad sa mobile car.

Gayonman, tinangka anilang agawin ng biktima ang baril ng isang pulis kaya pinaputukan siya ni PO3 De Villa.

Ikinagulat ng kaanak ng biktima ang nangyari na sinabing “over kill” lalo na’t traffic violation ang pinag-ugatan ng insidente.

Binigyang-diin ng nakatatandang kapatid na si Robert, may magandang rekord ang biktima at hindi nasangkot sa ilegal na droga.

( JAJA GARCIA )