60 completed bills iiwanang hindi nalagdaan ni PNoy

MAY panahon pa si Pangulong Noynoy Aquino hanggang alas-12:00 ng tanghali ngayong araw na ito para lagdaan ang 60 ‘completed bills’ para maisabataas o kung sakali ay tanggihan.

Ito ang napag-alaman kay outgoing secretary Herminio ‘Sonny’ Coloma Jr., ng Presidential Communications Operations Office (PCOO) sa panayam ng Hataw kahapon ng umaga sa Kapihan sa Manila Bay sa Café Adriatico sa Malate, Maynila.

Nagsimula na sina Pangulong Aquino at ang kanyang mga appointee na mag-empake sa Malacañang, sa antisipasyon ng administrasyon ni incoming president Rodrigo Roa Duterte, na manunumpa bilang president ng Filipinas ngayong katanghaliaan.

“I myself have started sorting out things and cleaning up. It’s only natural since it’s specified when we are supposed to leave,” ani Coloma.

Ayon sa kalihim, maaaring hindi na nga malagdaan ang mga nabalam na bill at hindi rin niya alam kung may ilan rito ang magla-lapse para maging batas makaraan ang preskripsyon na 30 araw simula nang maisumite sa punong ehekutibo.

“Ayaw niya (Aquino) ng fastbreak. Gusto niya mapag-aralang mabuti para matiyak kung ito ay para sa interes ng publiko,” ani Coloma.