Mekaniko tigok sa pagbangga sa kotse

BINAWIAN ng buhay ang isang 53-anyos mekaniko nang bumangga ang minamanehong motorsiklo sa isang rumaragasang kotse sa kalsadang madalas mangyari ang aksidente na hinihinalang may “spirit of death”  sa Makati City kahapon.

Nalagutan ng hininga sa Pasay City General Hospital ang biktimang si Edwin Datu, may asawa, mekaniko sa Camano Auto Repair Shop, ng 2300 Tramo St., Brgy. 64, Zone 8, Pasay City, dahil sa matinding pinsala sa ulo at katawan.

Habang nahaharap sa kasong reckless imprudence resulting in homicide ang driver ng pulang Mitsubishi Mirage (AHA 4403) na si Adelfa Fabon Sanares, 51, ng B-62, L-28, Nitrogen St., Golden City, Brgy. Anabu F, Imus, Cavite.

Sa imbestigasyon ni SPO2 Ernesto Panes Jr., ng Makati City Traffic Department, sumalpok ang asul na Honda motorcycle (9321PJ) na minamaneho ng biktima sa kotseng minamaneho ni Sanares sa panulukan ng  Dian at Finlandia Sts., Brgy. San  Isidro dakong 3:15 a.m.

Sinasabing biglang sumulpot ang kotse sa lugar kaya nabangga ng motorsiklo dahilan upang tumilapon nang ilang metro, nabagok ang ulo sa semento saka nawalan ng malay ang biktimang si Datu.

Isinugod ng Brgy. Bangkal Rescue Team ang biktima ngunit binawian ng buhay nang idating sa pagamutan.

Ilang residente sa lugar ang nagsabing madalas mangyari ang aksidente sa lugar na ikinamatay na rin ng ilang biktima kaya sinasabing may gumagalang espirito roon upang kumuha ng buhay ng tao.