Duterte naliitan sa suweldo ng presidente

DAVAO CITY – Kung si President-elect Rodrigo Duterte ang tatanungin, sa mga nangangarap na maging pangulo ng bansa, isa lang aniya ang kanyang magiging payo sa kanila.

Kung talagang may “passion” ang isang tao na manilbihan sa bansa, ito na lang daw ang magiging “driving force” na ipagpatuloy ang pangarap na maging pangulo.

Iginiit ng incoming president, napakaliit ng sahod ng isang presidente.

Nagbiro ang opisyal na hindi kasya ang kanyang tatanggaping halos P130,000 sahod na hahatiin lang ng kanyang dalawang misis.

Para kay Duterte, hindi niya pinangarap maging pangulo ng bansa ngunit dahil sa pagmamahal niya sa mga Filipino at sa kinakaharap na problema ng bayan, kaya pumayag siya sa panawagan ng taongbayan at tumakbo nitong nakalipas na halalan.

Samantala, batay sa bagong batas na Salary Standardization Law IV (SSL IV) na pinirmahan ni Pangulong Benigno Aquino III noong Pebrero 19, 2016, makikinabang sa pagtaas ng suweldo ang incoming president.

Ang first tranche sa salary increase ni Duterte ay aabot sa P160,924.

Pagsapit ng taon 2019, tataas na ito nang hanggang P399,739.

Ang salary grade katulad sa presidente ay magiging epektibo lamang sa pagtatapos ng termino ng isang incumbent official.