Drug test kinasahan ng solons

SANG-AYON ang ilang mambabatas sa mungkahi ni incoming House Speaker Pantaleon Alvarez na sumailalim sa sila sa drug test kung kinakailangan.

Walong kongresista ang nagsabing handa silang magpa-drug test kabilang sina Negros Occidental Rep. Albee Benitez, Isabela Rep. Rodito Albano, Cavite Rep. Alex Advincula, Cebu Rep. Bebot Abellanosa, Ifugao Rep. Teddy Baguilat, Davao Rep. Karlo Nograles, CIBAC Rep. Sherwin Tugna at Oriental Mindoro Rep. Doy Leachon.

Ngunit banggit ni Benitez, dapat hindi lamang silang mga mambabatas ang ipa-drug test kundi lahat ng mga empleyado ng gobyerno at mga halal na opisyal.

“OK lang sa akin at kahit sa lahat ng government employees,” arya ni Benitez.

Habang sambit ni Tugna, magandang ideya ang drug testing sa mga miyembro ng kapulungan para palakasin ang imahe nito bilang isang institusyon.

Samantala, sinabi ni Nograles, posibleng aniyang maging magastos kung lahat ay isasailalim sa naturang pagsusuri kung kaya ang mungkahi niya ay random testing para makatipid.

Sa panig, ni Leachon, binigyang-diin niyang dapat gawing requirements ang drug tests sa paghahain pa lamang ng ‘certificates of candidacy’ para sa lahat ng posisyon para mas maging mainam.