Police asset pinugutan sa Rizal

NATAGPUANG pugot ang ulo ng isang 25-anyos tricycle driver na sinasabing asset ng pulis, sa masukal na bahagi ng Brgy. Calumpang, Binangonan, Rizal.

Sa ulat na tinanggap ni Senior Supt. Adriano Enong Jr., Rizal PNP Provincial Director, kinilala ang biktimang si Mark James Nadora, 25, nakatira sa Katipunan St., Brgy. Calumpang ng nabanggit na bayan.

Sa naantalang ulat ng mga awtoridad, dakong 10 a.m. kamakalawa nang matagpuan ang pugot na bangkay ng biktima sa loob ng sako sa nabanggit na barangay.

Huling nakitang buhay ang biktima nitong nakalipas na Huwebes ng hapon makaraan sunduin ng isang sasakyan.

Hinala ng mga awtoridad, posibleng may kinalaman sa droga ang insidente.

Gayonman, itinanggi ni Supt. Noel Versoza, chief of police, ang ulat na bukod sa biktima ay mayroon pang tatlong police asset na pinatay sa nasabing bayan.

Samantala, ayon sa ilang ‘insider’ sa Binangonan PNP, 20 katao na ang napapatay sa lugar sa hindi mabatid na dahilan.