HATAW! D'yaryo ng Bayan hatawtabloid.com
SUGATAN ang isang pulis nang sadyang sagasaan ng driver ng motorsiklo sa pagtatangkang umiwas sa joint COMELEC checkpoint operation sa Brgy. Nagbunga, sa bayan ng San Marcelino, lalawigan ng Zambales, nitong Lunes, 10 Pebrero.
Kinilala ang sugatang alagad ng batas na si P/Cpl. John Nelson Flores, 36 anyos, residente sa Brgy. Pamatawan, Subic, Zambales, na tinamaan sa kaniyang kanang paa matapos sagasaan ng motorsiklo ng suspek.
Samantala, kinilala ang suspek na si alyas Bert, 25 anyos, residente sa Brgy. Cawag, Subic, Zambales, nagmamaneho ng itim na Honda TMX 155, may plakang UF 4677 nang siya ay i-flag down para sa inspeksiyon.
Imbes sumunod, mabilis niyang pinaharurot ang motorsiklo patungo kay P/Cpl. Flores at sinalpok ang pulis bago nagtangkang tumakas na kalaunan ay naaresto rin ng pulisya.
Kasalukuyan nang nakakulong ang suspek sa San Marcelino MPS custodial facility at nahaharap sa kasong frustrated homicide at disobedience to lawful orders.
Mariing tinuligsa ni P/BGen. Jean Fajardo, Regional Director ng PRO3 PNP, ang pag-atakeng ito sa isang pulis na nakatalaga para sa pangkapayapaan at kaayusan na kanilang sinumpaang tungkulin.
Aniya, anumang pagtatangkang suwayin o saktan ang mga nagpapatupad ng batas ay may haharaping kaso nang alinsunod sa umiiral na batas. (MICKA BAUTISTA)
