HATAW! D'yaryo ng Bayan hatawtabloid.com
SWAK sa kulungan ang isang lalaki matapos makuhaan ng patalim makaraang magwala at maghamon ng away sa Malabon city, kamakalawa ng hapon.
Nahaharap sa kasong paglabag sa Alarms and Scandal at BP 6 (Illegal Possession of Deadly Weapon) ang suspek na kinilalang si Ricardo Galura, Jr., 28 anyos, ng Brgy. Pio Del Pilar, Makati City.
Sa report nina P/SSgt. Ernie Baroy at P/SSgtt. Diego Ngippol kay Malabon police deputy chief Col. Rhoderick Juan, dakong 1:30 pm nang makatanggap ng tawag sa telepono mula sa concerned citizen ang mga tanod ng Brgy. Tugatog hinggil sa isang lalaki na nagwawala sa kahabaan ng M.H Del Pilar St., sa naturang barangay.
Agad nagresponde sa naturang lugar ang mga tanod at naabutan nila ang suspek na nagsisigaw habang hinahamon ng suntukan ang bawat makita niya.
Nagpakilala ang mga arresting officers na barangay tanod at tinangkang awatin ang suspek ngunit hindi sila pinansin at sa halip ay nagpatuloy sa eskandalo.
Napilitan ang mga tanod na arestohin ang suspek at nang kapkapan ay nakuha sa kanya ang isang kutsilyong pangkusina. (ROMMEL SALES)
