Willie, tumulong na nga napagbintangan pang pabida

NAGKAROON ng isyu ang pagpasok ni Willie Revillame sa isa sa nakaraang press briefing ni Presidential Spokesperson Harry Roque na nag-donate rin siya ng P5-M para sa mga driver at iba pang naapektuhan ng pandemya.

 

Sa episode ng Tutok To Win last Monday, hindi nagustuhan ni Willie ang nasulat sa isang online site na na-high jack niya ang press briefing at nagpabida nang mag-donate ng malaking halaga.

 

Nagmagandang-loob si Willie na ipagamit ang lugar niya dahil may empleado sa government station na apektado ng Covid-19. Napanood namin ang briefing na ‘yon nang tawagin siya ni Spox Roque para pasalamatan bago matapos ang telecast.

 

“Dala-dala ko nga ‘yung upuan ko nang tawagin ako. Ayoko ngang pumasok dahil hindi naman ako politiko.

 

“Pero hindi ako nagpapabida nang magbigay ako ng pera. Gusto kong tumulong pero hindi ko alam kung kanino ibibigay. Kaya kay Sec. Roque ko ipinadaan ang tulong.

 

“Hindi lang isang beses itong ginawa ko. Next month, magbibigay uli ako,” bahagi ng paliwanag ni Willie.

 

Bukod sa mga driver, nagpahatid ng tulong ang TV host sa pamilya ng mga OFW na namatay dahil sa pagsabog sa Beirut, Lebanon.

 

I-FLEX
ni Jun Nardo