Mag-ama niratrat (Pinasok sa bahay)

PATAY ang mag-ama matapos pasukin sa loob ng kanilang bahay at pagbabarilin ng dalawang hindi kilalang suspek na hinahanap ang manugang ng matandang biktima sa Caloocan city, kamakalawa ng gabi.

 

Dakong 11:00 pm, natutulog ang biktimang si Juanito Labarigo, 65 anyos, at ang 26-anyos anak na si Jericho sa loob ng kanilang bahay sa Jasmin St., Bicol Area Libis, Barangay 175 Camarin nang sapilitang pumasok sa loob ang mga suspek at tinatanong kung nasaan si  “Baet.”

 

Isa sa mga suspek ang kumaladkad kay Jericho palabas ng kanyang kuwarto dahilan upang mamagitan ang kanyang ina na si Ligaya, 53 anyos, at sinabi sa gunman na wala sa kanilang bahay ang kanyang manugang na hinahanap nila saka hiniling na palayain ang kanyang anak.

 

Gayonman, hindi pinakinggan ang pakiusap ni Ligaya at isa sa mga suspek ang bumaril nang paulit-ulit sa katawan ni Jericho hanggang mamatay saka ibinaling ng suspek ang kanyang baril kay Juanito na nasa isa pang kuwarto.

 

Sinubukang tumakas ni Juanito ngunit pinagbabaril din ng mga suspek sa harap ng limang bata na sa kabutihang palad ay hindi nasaktan bago mabilis na nagsitakas patungo sa hindi matukoy na direksiyon.

 

Inamin ni Ligaya sa pulisya na sangkot sa ilegal na droga si ‘Baet’ at hinala nila na iyon ang dahilan kung bakit siya hinahanap ng mga suspek.

 

Patuloy ang follow-up investigation ng pulisya sa posibleng pagkakilanlan at pagkakaaresto sa mga suspek. (ROMMEL SALES)