Buhangin sa tabing-dagat ng Navotas ‘ninakaw’

KALABOSO ang tatlo katao nang mahuling ‘nagnanakaw’ ng buhangin sa baybaying dagat sa Navotas City, kahapon ng madaling araw.

 

Umabot sa 35 sako ng buhangin ang naipon ng mga suspek na kinilalang sina Fernando dela Cruz, 37 anyos; ang nakababatang kapatid na si Cesar, 26 anyos, kapwa mangingisda, at residente sa Sto. Domingo St.; at kapitbahay nilang si Joseph Guatno, 24 anyos, construction worker.

 

Batay sa ulat, dakong 2:00 am, nang mamataan ng mga nagpapatrolyang tauhan ng Integrated Advance Command Post (IACP) I, Navotas Water Cluster ng Maritime Police sa baybayin ng Barangay Tangos North.

 

Lumabas sa imbestigasyon ni P/SMSgt. Nemesio Garo II, bago mag-1:00 am ay sinimulan ng tatlo ang pagbubungkal ng buhangin sa baybaying dagat sa pag-aakalang wala nang magpapatrolyang tauhan ng Maritime Police.

 

Unang inamin ng tatlo kay P/SMSgt. Garo na ibebenta nila ang mga buhangin ngunit nang kinuhaan ng pahayag ay iniutos lamang umano sa kanila ang pagkuha ng buhangin na gagamitin sa isang construction site.

 

Nauna nang iniutos ni Navotas Fish Port Complex Maritime Police chief, Lt. Col. Melvin Laguros ang 24-oras na pagbabantay sa mga baybaying dagat ng lungsod upang matiyak na hindi makalulusot ang mga gumagawa ng ilegal na aktibidad.

 

Kasong paglabag sa Batas Pambansa 265 (An Act Prohibiting the Extraction of Gravel and Sand from Beaches) ang isasampa ng Maritime Police laban sa tatlo sa piskalya ng Navotas City. (ROMMEL SALES)