HATAW! D'yaryo ng Bayan hatawtabloid.com
SUSUDSURIN ng Manila International Airport Authority (MIAA) kung paanong nakalabas ng bansa nang hindi napapansin ang isang turistang Filipina dala ang 700 gramo ng cocaine at naipuslit sa Hong Kong.
Inatasan ni MIAA General Manager Ed Monreal ang kanyang security officials na magsagawa nang masusing imbestigasyon at kuwestiyonin ang lahat ng mga opisyal na nakatalaga sa inisyal at final security check sa terminal 2 at 3.
Sinabi ni Monreal, ang unang dapat gawin ay alamin kung saan kumuha ng flight ang Filipina patungong Hong Kong, pangalawa, kung anong flight ang kanyang sinakyan para mabatid kung anong oras siya umalis at kung sino ang personal na naka-duty sa nasabing araw at oras.
Ito ay makaraan maaresto ng Hong Kong customs ang isang Filipina tourist sa kanyang pagdating mula sa Manila nitong Hulyo 30, 2016 at kinasuhan ng drug trafficking sa Tsuen Wan Court noong Agosto 1, 2016.
Ang 37-anyos Filipina telephone operator ay nahulihan sa kanyang handbag ng 700 gramo ng hinihinalang cocaine na nagkakahalaga ng $750,000 ang street value.
Ang pagkaaresto sa isang Filipina noong Hulyo 30 sa Chek Lap Kok ang unang napaulat na kaso ng drug trafficking mula sa Maynila sa pagsisimula nang pag-upo sa puwesto ng administrasyong Duterte noong Hulyo 1.
Sa ulat mula sa Hong Kong, sa isinagawang spot check sa bagahe ng Filipina, napansin ng mga awtoridad ang kahina-hinalang x-ray images sa loob ng kanyang hand bag.
Nabatid sa masusing pagsusuri ang dalawang slabs ng hinihinalang cocaine, ang isa ay tumitimbang ng tinatayang 330 gramo at ang pangalawa ay 390 gramo, na nakatago sa false compartment ng kanyang bag.
Itinakda ng Magistrate Cheang Kei-hong ang pagdinig sa Kaso sa Oktubre 24 para sa masusing imbestigasyon, at iniutos ang pagkustodiya sa Filipina.
Iniutos din ng korte sa Filipina na bumalik sa korte sa Agosto 9 para sa bail review.
Ang insidente ay naganap sa gitna nang maigting na kampanya ni Pangulong Rodrigo Duterte laban sa droga at sa mga supplier nito na nagresulta sa pagkamatay ng daan-daang mga sangkot sa droga.
ni Jerry Yap
