Palasyo kakampi pa rin ng media

SINISIKAP ni Presidential Communications Office (PCO) Secretary Martin Andanar na resolbahin ang sinasabi niyang cultural/communications gap ni Pangulong Rodrigo “Digong” Duterte sa media.

Kung matatandaan, nagkaroon ng statement dati si Pangulong Digong na mas komportable para sa kanya na huwag siyang interbyuhin ng media o magsalita sa harap nila.

Ayon kay Secretary Andanar, paplantsahin niya ang “gap” na ito.

Siyempre Secretary Andanar, it’s your job.

Simula nang pagdesisyonan ng Palasyo na tanging government media ang magko-cover sa Pangulo medyo natahimik nga ang iba’t ibang interpretasyon na nag-anak pa ng iba’t ibang espekulasyon.

Siguro nga, mayroong cultural at communications gap…

Mayroon kasing lengguwahe ang Pangulo na mabagsik ang dating sa mga taga-lungsod (upper & middle class) pero pinapalakpakan ng mga promdi at ng mga kababayan natin na nabubuhay sa ilalim ng guhit ng poverty level.

Kumbaga, hindi pa lubos na nakikilala o hindi pa kabisado ng media sa lungsod ang ‘konteksto’ ng lengguwahe ng Pangulo.

Kaya madalas, nagkakaroon ng misinterpretasyon.

At kung hindi ito nauunawaan ng publiko, diyan papasok ang papel ng PCO.

Mula nang magdeklara nang pananahimik sa media ang Pangulo hanggang nitong inagurasyon, wala tayong narinig na conflict.

Lahat nang narinig natin sa kanya, pinalakpakan ng tao.

Si Pangulong Digong ay hindi nagsasalita sa pagitan ng mga salita sa tinta at papel…

Sabi nga, nagsalita siya mula sa kanyang puso kaya naintindihan siya ng bayan.

At kung ginagawa na ng mga inatasan niya ang kanyang utos, tiyak sasabihin nila, ito na nga ang pagbabago.

Sabi nga, ang salita ay hindi mauunawaan hangga’t hindi natin nakikita na naisasakatuparan.

Samantala, ang media, ang tanging papel ay ihatid sa madla kung ano ang mga nagaganap sa ilalim ng bagong administrasyon.

Hindi nagbabantay ang media para manilip ng pagkakamali, ang media ay naririyan para ibalita kung ano ang mga nangyayari.

Kamakalawa, kaagad na nagpalabas ng statement ang Palasyo sa pamamagitan ni Sec. Martin Andanar na kinokondena ang unang media attack sa isang broadcaster sa Duterte administration.

At tingin namin sa media, si Secretary Martin Andanar ay isang mapagkakatiwalaang source para may maibalita kami sa mamamayan dahil galing siya sa aming hanay.

(Hindi gaya ng pinalitan nya na elitista ang dating?!)

It’s a pleasure working with you, Mr. Secretary!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com