2 patay, 5 kritikal sa van vs tricycle

PATAY ang dalawa katao habang lima ang kritikal sa salpukan ng pampasaherong van at tricycle sa Polomolok, South Cotabato nitong Martes.

Batay sa imbestigasyon ng traffic police, parehong papunta sa direksiyon ng bayan ng Tupi ang dalawang sasakyan nang magbangaan sa Purok Lusanes, Brgy. Sulit dakong 1:30 p.m.

Sinasabing mabilis ang takbo ng van nang mag-overtake sa tricycle.

Biglang lumiko ang mas maliit na sasakyan kaya naararo ito ng van.

Nagpagulong-gulong ang tricycle nang halos 10 metro dahil sa lakas nang pagkakabangga.

Agad nadala sa pagamutan ang pitong nasaktan na pawang pasahero ng tricycle.

Ngunit binawian din ng buhay ang mga biktimang sina Maternidad Biñan at Juvy Jane Aristoque.

Nasa kritikal na kondisyon sina James Lorica, driver ng tricycle, Rubylyn Maglasang, Rebecca Lara, Edgardo Biñan at isang 7-anyos bata.

Kasalukuyan silang inoobserbahan sa South Cotabato Provincial Hospital ang mga biktima.

Nasa kustodiya ng pulisya ang driver ng van at dalawa niyang pasahero.

Kakasuhan ng reckless imprudence resulting in multiple homicide and serious physical injuries at damage to properties ang driver ng van.