Marcelino kinatigan ng DoJ vs kasong droga

IBINASURA ng Department of Justice ang reklamong may kinalaman sa ilegal na droga na inihain ng Philippine Drugs Enforcement Agency (PDEA) laban kay Marine Colonel Ferdinand Marcelino.

Matatandaan, si Marcelino ay inaresto ng mga tauhan ng PDEA at Anti-Illegal Drugs Group ng PNP sa pagsalakay na ikinasa ng mga awtoridad sa Sta. Cruz, Maynila nitong Enero ng taon.

Si Marcelino ay ipinagharap ng reklamong paglabag sa Section 11 at 26 ng RA 9165 o Comprehensive Dangerous Drugs Act na tumutukoy sa pagmamanupaktura at pag-iingat ng ilegal na droga.

Ngunit sa resolusyon ng DoJ na pirmado ni Senior Deputy State Prosecutor Theodore Villanueva, hindi nakitaan ng probable cause ang reklamong inihain laban kay Marcelino.

Sa isang hiwalay na resolusyon, ibinasura rin ng DoJ ang reklamong paglabag sa Republic Act 105-91 o Comprehensive Law on Firearms and Ammunition Regulation Act at Comelec Gun Ban laban kay Marcelino.