2 bata patay, 3 naospital sa butete

NAGA CITY – Binawian ng buhay ang dalawang menor de edad habang nananatili sa ospital ang tatlong iba pa makaraan kumain ng butete sa Brgy. Sabang, Calabanga, Camarines Sur kamakalawa.

Ayon sa ama ng mga biktima na si Arvin Bristol, 27, ang nabiling butete ang ginawa nilang ulam kamakalawa at binigyan din nila pati ang kapitbahay.

Makaraan ang ilang oras, sabay-sabay na nakaramdam nang panghihina at pagsusuka ang apat niyang mga anak kabilang ang isang-taon gulang na sanggol.

Agad isinugod sa ospital ang mga biktima ngunit idineklarang ‘dead on arrival’ ang 7-anyos at 6-anyos.

Samantala, kahapon ng umaga lamang isinugod sa ospital ang anak ng kanilang kapitbahay na kumain din ng nasabing isda.

Patuloy pang inoobserbahan ang kalagayan ng tatlong bata na nananatili sa ospital.