‘Rapist’ taxi driver arestado sa Taguig

KALABOSO ang isang taxi driver nang maaresto makaraan positibong ituro na siyang humalay at nagnakaw sa kanyang pasahero sa Taguig City.

Nakapiit sa Taguig City Police ang suspek na si Ramil Marco Neric, 25, may asawa, driver ng Rei-Rette Taxi (UVR-922), positibong itinuro ng 20-anyos biktima.

Base sa ulat ni Inspector  Rommel Bulan, commander ng Police Community Precinct (PCP) sa Bonifacio Global City (BGC), namataan ang suspek habang naghihintay ng kanyang pasahero sa lugar dahilan nang kanyang pagkaaresto kahapon.

Sa reklamo ng biktima, galing sila sa isang bar nang sumakay ng taxi kasama ang mga kaibigan nitong Linggo para magpahatid sa kanilang tinutuluyang apartment.

Habang nasa biyahe, nakiusap ang mga kaibigan ng biktima sa driver na ihinto ang taxi sa isang malapit na gasolinahan upang umihi kaya’t naiwan sa sasakyan ang nakatulog na babae dahil sa kalasingan.

Paglabas ng mga kaibigan mula sa comfort room, nagulat sila nang hindi na makita ang taxi at labis na nag-alala sa posibleng mangyari sa biktima.

Nagising na lamang ang biktima habang nasa loob ng isang motel sa Pasig at doon ay hinalay siya ng suspek.

Pagkaraan ay kinuha ng suspek ang kanyang cash at ilang personal na gamit bago inihatid sa tinutuluyang apartment.

Nagsumbong ang biktima sa mga kaibigan kaya sinamahan siyang maghain ng reklamo sa pulisya laban sa suspek.

Sa pulisya, positibong itinuro ng biktima at mga kaibigan ang ‘rapist’ taxi driver. (JAJA GARCIA)