Pritong saging, biko at bibingka ihahain ni Digong sa inagurasyon

DAVAO CITY – Bukod sa simpleng inagurasyon, aasahan din ang simpleng mga ihahanda sa inagurasyon ni incoming President Rodrigo Duterte sa Hunyo 30 sa Rizal Ceremonial Hall sa Malacañan Palace.

Una rito, sinabi ni Christopher Lawrence “Bong” Go, executive assistant at incoming head ng Presidential Management Staff,  makaraan ang panunumpa ni Duterte, magkakaroon lamang ng “light finger food” gaya ng piniritong saging, biko at bibingka.

Dagdag ni Go, imbes wine, ipatitikim sa mga bisita ang tablea (hot chocolate) na galing sa Malagos Chocolate sa lungsod ng Davao.

Magsasagawa rin ng tour sa Malacañang Museum pagkatapos nang programa.

Hindi muna uuwi ng Davao ang incoming president bagkus mananatili muna siya sa ‘Bahay Pangarap’ na nagsilbi ring official residence ni outgoing President Benigno Simeon Aquino III.

Ito ay katapat lamang ng Palasyo at kailangang tawirin ang Pasig River.

Una rito, pinaninindigan ng alkalde na hindi niya gagawin ang inagurasyon sa Quirino Grandstand sa Luneta na pinagdausan ng oathtaking noon ni Pangulong Aquino at iba pang mga presidente ng bansa.