Buntis, 9 pa sugatan sa demolisyon

UMABOT sa 10 katao ang sugatan, kabilang ang isang buntis, nang makipagbuno ang mga residente sa riot policemen na kasama ng demolition team na gigiba sa kanilang bahay sa Tandang Sora, Quezon City  nitong Huwebes ng umaga.

Ayon sa ulat, ilang mga pulis at miyembro ng demolition team ang nasugatan makaran maghagis ng bato at bote ang mga residente.

Napag-alaman, inimpormahan nitong Miyerkoles ng city government ang chairman ng Brgy. Tandang Sora na si Hector Geronimo, may hurisdiksiyon sa 1,668 square meter property na pag-aari ni Reynaldo Guiyab, sa gagawing demolisyon sa mga estruktura na ipatutupad.

Ngunit iginiit ng mga residente, hindi sila inabisohan ng barangay official kaugnay sa demolisyon at wala rin inialok na relokasyon para sa kanila.

Gayonman, sinabihan ang mga residente na sila ay pagkakalooban ng P30,000 relocation assistance.