Ceasefire muna (Trillanes kay Digong)

SA kabila ng negatibong pahayag ni Incoming President Rodrigo Roa Duterte laban kay Senator Antonio Trillanes IV, hindi natitinag ang mambabatas  sa napipintong pag-upo ng dating alkalde ng Davao dahil wala umano siyang kinatatakutan at kailan ma’y hindi siya nasangkot sa ano mang anomalya.

Sinabi ito ni Trillanes sa regular na Kapihan sa Manila Bay sa Café Adriatico sa Malate, Maynila, bilang panelist sa talakayan kasama sina education assistant secretary Jessie Mateo at Preciosa Soliven ng Operation Brotherhood Montessori.

Ayon kay Trillanes, bibigyan niya umano ng daan para patunayan ng bagong pangulo ang kanyang mga pangako sa sambayanan na lilinisin ang pamahalaan sa korupsiyon at susugpuin ang kriminalidad para sa kapakanan ng buong bansa.

“I will give him elbow room to do what he has promised. Let us see what he will do when he assumes the presidency on June 30,” diin ng Senador.

Nang tanungin kung ano ang reaksiyon sa mga negatibong komento tungkol sa kanya, tumugon ang senador na hindi siya naaapektohan.

“I am not vindictive. We’ll wait what happens but for now, ceasefire muna tayo,” aniya.

Ayon kay Trillanes hangga’t hindi opisyal ang pag-upo ni Duterte bilang pangulo ng bansa, maituturing  na  hindi epektibo at walang bilang ang tila mga kautusang kanyang inihahayag.

Minsang nagsabi si Duterte kung bakit tinanggihan si Trillanes na maging running mate na ‘dirty na at undeserving pa’ umano ang namuno sa 2013 Oakwood mutiny.