Facebook nag-sorry sa baliktad na PH flag

AGAD humingi ng paumanhin ang social networking service na Facebook kaugnay sa nakabaliktad na watawat ng Filipinas, ang kulay pula ang nasa itaas at asul ang sa ilalim, sa Independence Day greeting nila kahapon.

Sa statement na inilabas ng social media giant, sinabi nitong hindi nila sinasadya ang pagkakamaling nangyari.

Malaki raw ang kanilang pagpapahalaga sa taong-bayan ng Filipinas na nais maging ‘connected’ sa mga tao sa ika-118 selebrasyon ng Araw ng Kalayaan sa bansa.

“This was unintentional, and we’re sorry, we care deeply about the community in the Philippines and, in an attempt to connect people on Independence Day, we made a mistake.” pahayag ng Facebook.

Nabatid na agad pumukaw sa atensiyon ng mga Filipino ang pagkakamali sa kulay ng ating watawat.

Umani ang nangyaring ‘blunder’ ng sari-saring reaksiyon mula sa users ng website na agad ibinahagi ang mga post sa iba’t ibang social media websites.

Tuwing may giyera lamang ibinabaliktad ang kulay ng watawat, na pula ang nasa itaas habang asul ang nasa ilalim.