Piskalya umalma sa isyung droga

CAGAYAN DE ORO CITY – Idinepensa ng Cagayan de Oro City Prosecutor’s Office ang local prosecutors na sinasabing ilan sa kanila ang sabit sa illegal drug trade sa bansa.

Ito ay makaraan ibulgar ni incoming Department of Justice (DoJ) Secretary Atty. Vitaliano Aguirre II na mayroong ilang gov’t prosecutors na sangkot sa nagpupuslit ng droga.

Ayon kay Chief City Prosecutor Fidel Macauyag, wala sa kanilang level na masangkot sa ipinalutang ni Aguirre dahil nasa DoJ-Manila ang automatic review ng drug resolution ng mga kaso.

Inihayag ni Macauyag, hindi nagtatagal sa kanilang poder ang mga sensitibong kaso bagkus ay agad nilang iniaakyat sa panel of prosecutors sa tanggapan ng central office para sa pag-review.

Dagdag ng opisyal, mayroong illegal drug cases na kanilang naibasura dahil halatang planted evidence lamang ng ilang law enforcers.

Una rito, sinabi ni Aguirre, nadesmaya siya na maging siya ay biktima rin ng “midnight resolution” ng piskal na nabayaran ng kanilang kalaban sa kaso.