HATAW! D'yaryo ng Bayan hatawtabloid.com
MA at PA
ni Rommel Placente
NAG-JOKE ang Phenomenal Box-office Star na si Vice Ganda tungkol sa kinasangkutang kontrobersiya kamakailan ni Julie Anne San Jose.
Sa segment ng It’s Showtime na Tawag ng Tanghalan, nag-joke si Vice tungkol sa kinasangkutang kontrobersiya kamakailan ni Julie Anne, ang pagkanta nito ng fast song na Dancing Queen sa loob ng simbahan.
Pinuri-puri ni Vice ang contestant sa pagkanta nito ng You Are My Destiny ni Paul Anka. Para raw pang-Linggo talaga ang boses nito, na ibig sabihin pwedeng-pwedeng pang-simbahan ang boses nito.
Kaya tinanong ni Vice ang contestant kung ano ba ang ginagawa nito every Sunday.
“Nagsisimba,” mabilis na sagot ng TNT contestant.
“Anong kinakanta sa simbahan?” sundot na tanong ni Vice. Pero siya na rin ang sumagot, “Dancing Queen. Charot!
“Charot lang, kayo naman! Sinasakyan ko lang ‘yung mga eksena n’yo,” ang natatawa pang hirit ng TV host-comedian.
Naging malaking isyu ang pagpe-perform ni Julie Anne sa loob ng isang simbahan sa Occidental Mindoro, para sa isang benefit concert.
Hindi nagustuhan ng ilang Pinoy ang pagkanta ng Kapuso actress-singer ng Dancing Queen ng Abba sa mismong altar ng simbahan pati na ang kanyang suot na gown na may mahabang slit.
Hindi raw kasi appropriate ‘yun sa lugar na idinaos ang concert.
Unang naglabas ng public apology ang GMA Sparkle talent management hinggil sa nangyari na sinundan ng official statement ng kura paroko ng simbahan.
Nag-sorry din si Julie Anne sa lahat ng na-offend sa naging performance niya sa loob ng simbahan na sinabi niyang wala siyang intensiyon na makasakit ng kapwa.
Ano naman kaya ang magiging reaksiyon ni Julie Anne kapag nakarating sa kanya ang pagjo-joke sa kanya ni Vice? Hindi naman siguro siya mao-offend since alam naman niya na isang komedyante si Vice, ‘di ba?
