HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
KOMPIYANSA ang Action Man at Idol ng Bayan Raffy Tulfo na kayang-kaya ni Presidential aspirant Ping Lacson na malulutas nito ang problema ng bansa sa droga.
Ani Tulfo, idol niya ang senador pagdating sa disiplina at katapatan.
At kahit independent candidate si Raffy bilang senatorial aspirant, sumama siya sa tambalang Ping Lacson-Tito Sotto dahil swak ang adbokasiya nila ng standard bearer ng Reporma Party.
“Ikaw ang idol ko. Totoo iyan, pagdating sa disiplina at honesty,” ani Raffy nang sumama ito kay Ping sa Cavite kamakailan sa pakikipagkonsultasyon sa mga tao.
Nagpapasalamat din si Tulfo kay Ping dahil iginalang ang desisyon niya na maging independent.
Maraming problema tungkol sa droga ang inilalapit kay Raffy sa kanyang programa kaya sinabi ng TV host na naniniwala siya na kayang tugunan ni Ping ang naturang suliranin, bagay na hindi nagawa ng kasalukuyang administrasyon.
Para kay Raffy, nagkulang ang kasalukuyang administrasyon pagdating sa rehabilitasyon ng mga sumukong drug addict, bagay na naniniwala siyang gagawin ng magiging administrasyon ni Ping kapag naging presidente.
Paliwanag ni Raffy, kung gagaling ang mga addict, mawawalan na ng pagsusuplayan ng droga ang mga pusher at drug lord, alinsunod sa tinatawag na “law of supply and demand.”
