HATAW! D'yaryo ng Bayan hatawtabloid.com
FACT SHEET
ni Reggee Bonoan
MUKHANG mapapasabak sa aktingan si Nadine Lustre kapag natuloy na ang pelikulang gagawin niya sa Viva Films mula sa direksiyon ni Yam Laranas base rin sa pahayag noon ni Vincent del Rosario nang nakapanayam siya ng media para sa Vivamaxxed launch.
Makakasama kasi ni Nadine ang sina Diego Loyzaga at Epy Quizon na alam naman ng lahat kung gaano ka-intense ang dalawa pagdating sa pag-arte.
Siyempre hindi naman papatalo si Nadine bilang 2019 Gawad Urian Best Actress para sa pelikulang Never Not Love You na ipinalabas noong 2018 kasama ang ex-boyfriend na si James Reid na idinirehe ni Antoinette Jadaone for Viva Films.
Wala pang nabanggit sa amin kung ano ang kuwento at titulo ng pelikula nina Nadine, Diego, at Epy pero ang sigurado ay sa Nobyembre ang shooting nito.
Sa kasalukuyan ay nasa Siargao pa rin si Nadine at walang binanggit sa amin ang aming source kung kailan siya babalik ng Maynila.
Hmm, baka naman bago magsimula ang shooting niya sa Viva ay may kasama siya sa pagbabalik? Masaya raw kasi ngayon ang aktres sa Siargao dahil nagagawa niya ang gusto niya bilang ordinaryong mamayan at wala sa harap ng camera.
