HATAW! D'yaryo ng Bayan hatawtabloid.com
UPANG mapigilan ang pagrami at paglawak ng mga posibleng dapuan ng Delta variant ng CoVid-19, puspusan ang ginagawang hakbang at paghahanda nina Manila Mayor Francisco “Isko Moreno” Domagoso at Vice Mayor Honey Lacuna para mapigilan ito.
Ayon sa negosyante at dating konsehal ng Maynila na si Don Ramon Bagatsing, nakita niya nang personal ang sinserong ginagawang hakbang ni Yorme Isko at Vice Mayor Honey upang hindi na kumalat pa ang Delta variat sa mga residente sa lungsod.
Sinabi ni Bagatsing, lahat ng precautionary measure ay ginagawa ni Yorme at Honey bago ang pagbabalik ng ECQ sa Metro Manila simula sa 6 Agosto hanggang 20 Agosto.
“The anticipated actions of Yorme Isko and Honey Lacuna will ensure that Manila is prepared to slow the spread of the CoVid-19 Delta variant. The Luneta field hospital, the free drive thru CoVid-19 testing, and having vaccinated almost a million Manileños will keep the Delta variant from spreading faster than expected,” pahayag ni Bagatsing
Aniya, maraming nagtaka kung bakit pa nagtayo ng field hospital sa Luneta noong nakalipas na buwan noong panahon na bumababa na ang mga kaso ng CoVid-19 ngunit ngayon ay nakita na ang pangangailangan nito.
“Maraming nagtaka, pero ngayon kailangan na ito, para hindi magkulang ng kama kung sakaling dumami ang kaso,” sabi ni Bagatsing.
Inihayag ni Bagatsing na masakit ang lockdown para sa sa mga residente, negosyo, at ekonomiya, pero kapag maagapan ito ay posibleng wala nang CoVid-19 sa Pasko.
Nanawagan si Bagatsing sa ibang private sector na may kaya sa buhay na tumulong sa abot ng kanilang makakaya.
Matatandaan, pinagamit ni Don Ramon Bagatsing ang kanyang mga dormitoryo sa Maynila bilang pansamantalang tirahan ng medical frontliners.
“Handa akong tumulong ulit. Dapat isang bangka tayo, it is the only way can overcome this Delta variant storm,” ani Bagatsing.
