Matinding korupsiyon sa LGUs pahirap sa Telcos

NAPAG-ALAMAN ni Pangulong Rodrigo Duterte na ang matinding kuropsiyon at red tape sa mga LGU o lokal na pamahalaan ang sanhi ng mabagal na pagpapabuti at reporma sa serbisyo ng mga telco sa bansa.

“It’s really corruption,” pahayag ng pangulo sa pakikipag-usap sa presidente at chief executive officer ng Globe na si Ernest Cu.

Nangyari ang pag-uusap matapos magbanta si Duterte sa ikalimang State of the Nation Address (SONA) na maaaring ipasara ng gobyerno ang mga higanteng telcos gaya ng Globe at Smart kung matapos ang taon na walang magandang pagbabago sa mga serbisyo nito.

Inilantad ni Cu na katakot-takot at napakaraming permit at dokumento ang hinihingi at kung ano-anong mga bayarin ang sinisingil ng mga LGU sa Globe para mapahintulutang makapagtayo ng karagdagang telecommunication tower.

Ayon kay Cu, inaabot nang walong buwan ang pagpoproseso ng mga permit, at pabago-bagong rin ang mga permit na hinihingi kung kaya hindi na nila alam kung matutuloy pa ang mga proyekto ng Globe na magpapabuti sa serbisyo nila sa taongbayan.

“Isipin niyo lang ho ‘yun, sir, kung nag-apply kami ng 5,000 towers times 28 or 30 permits ay ilang libong permit ang kukunin namin para makapag-umpisa?” sumbong ni Cu.

“Alam mo you can ask Bong (Sen. Bong Go), or Sonny (Finance Sec. Carlos Dominguez III) or the generals, kay [DILG] Sec. Año. Isumbong ninyo na lang nang deretso,” mariing sagot ni Duterte.

Kasama ang pagtatayo ng mga telco towers sa programa na “ease of doing business” ng administrasyong Duterte na nagsusulong na mapabilis at maging simple ang mga proseso sa pagbibigay ng mga permit.