HATAW! D'yaryo ng Bayan hatawtabloid.com
NALAMBAT ng mga ahente ng National Bureau of Investigation (NBI) ang tatlong miyembro ng Abu Sayaff Group (ASG) sa serye ng operasyon nitong Hulyo 17, 20 at 21 sa magkakahiwalay na lugar sa Taguig at Sampaloc, Maynila.
Kinilala ni NBI Director Eric Distor ang mga ASG member na sina Ben Saudi alyas Erie; Ajvier Kuhutan, alyas Jaber; at kapatid nitong si Adzmi Kuhutan alyas, Osein/Abduraya.
Sa report, sangkot ang tatlong naaresto sa pagkidnap sa anim na miyembro ng Christian Religious Sect sa Patikul, Sulu noong 20 Agosto 2002 at kasama sa Order of Arrest, naka-dock sa ilalim ng Criminal Case No. 128923-H A to E para sa anim na kaso ng “Kidnapping at Serious Illegal Detention with Ransom” na kasalukuyang nakabinbin sa Taguig City Regional Trial Court, Branch 271.
Ayon sa report, nahuli ang mga suspek ng NBI Counter-Terrorism Division (NBI-CTD) sa pakikipagkoordinasyon sa Special Action Force-Rapid Deployment Battalion ng Philippine National Police (PNP) at counterparts mula sa Armed Forces of the Philippines (AFP).
Noong 13 Hulyo isang testigo ang kumilala kay Erie, kaya noong 17 Hulyo, inaresto ng mga awtoridad.
Habang si Jaber, na isa sa perimeter guard ng ASG, ay naaresto noong 21 Hulyo sa Sampaloc, Maynila matapos kilalanin sa police line-up.
Nabatid na si Osein o Abduraya, ay miyembro ng mga nagbantay sa mga kinidnap na biktima at nakatatandang kapatid ni Jaber, ay nadakip noong 21 Hulyo nang sumama sa kanyang mga kaanak sa NBI detention facility para kunin ang mga gamit ni Jaber.
Hiniling ng NBI na ipresinta ni Adzmi ang kanyang barangay ID at pinahubad ang facemask para maberipika kung siya nga ang larawan sa ID pero nang alisin ang kanyang face mask lumabas na siya ang taong kinilala ng testigo na si Osein/Abduraya.
Nasa kustodiya ng NBI, ang tatlo at hinihintay na lamang ang mga dokumento para mailipat sila sa Special Intensive Care Area (SICA), BJMP sa Taguig City. (VV)
