Ang Probinsyano, ‘di pa tatapusin (mga artista naka-block hanggang July)

HINDI totoong matatapos na ang FPJ’s Ang Probinsyano ni Coco Martin ngayong Pebrero na ilang beses naming nasulat dahil ito ang narinig namin noong nakaraang taon.

Naklaro namin ito nang makausap ang head ng Dreamscape Entertainment na si Deo T. Endrinal sa nakaraang celebrity screening ng Meet Me In St. Gallen nitong Martes ng gabi.

Nagtatakang sabi sa amin ni sir Deo, “Ha? Wala naman kaming sinasabing magtatapos na, saan mo narinig?”

Sabay sabing, “basta ang mga artista sa ‘Probinsyano’ naka-block sila hanggang July, alam nilang lahat ‘yun. Ang dami pang mangyayari, abangan mo.”

Kung marami pang mangyayari ay ibig sabihin maraming papasok na bagong karakters at tinanong namin kung sino-sino.

“Oo mayroong mga bago pero hindi ko sasabihin sa ‘yo kasi isusulat mo,” pabirong sagot sa amin ng TV head.

Naisip din naman namin na paano tatapusin ang isang programa na mataas ang ratings at maraming pumapasok na ads? Alangang ihinto mo ito gayung kumikita naman.

Kaya sa mga patuloy na sumusubaybay ng Ang Probinsyano, tuloy pa rin ang ligaya sa panonood nito pagkatapos ng TV Patrol.

FACT SHEET
ni Reggee Bonoan