NADISKUBRE ng tropang militar ang P6.8-bilyong halaga ng hinihinalang shabu sa isang abandonadong speedboat sa Sitio Agbalite, Barangay Harrison, bayan ng Paluan, lalawigan ng Occidental Mindoro, nitong Martes, 10 Marso.
Ayon sa Armed Forces of the Philippines – Southern Luzon Command, natagpuan ng kanilang mga tauhan ang kontrabando matapos makatanggap ng impormasyon mula sa isang concerned citizen kaugnay ng isang twin-engine speedboat na sumadsad sa dalampasigan.
Narekober mula sa speedboat ang 43 sako ng pinaniniwalaang shabu, isang Star Link communication device, 8 bengala, 3 fire extinguishers, 4 baterya, 2 life jacket, at 2 salbabida.
Nakatakdang sumailalim sa beripikasyon at pagsusuri sa laboratoryo ang mga nasamsam na kontrabando habang patuloy na nagsasagawa ng imbestigasyon ang mga awtoridad.
