Vendor patay sa saksak

PINATAY sa saksak ng isang lasenggo ang kanyang 43-anyos live-in partner nang hindi makapagbigay ng pambili ng alak sa Port Area, Maynila kamakalawa ng gabi.

Binawian ng buhay sa Gat Andres Bonifacio  Memorial Medical Center dakong  9:57 pm ang biktimang si Baunut Mapusali, residente sa Block 11, Baseco Compound, Port Area.

Habang pinaghahanap ang suspek na si Lux Mangcao  alyas Kakok, 45-anyos, mabilis na tumakas makaraan ang insidente.

Sa imbestigasyon ni SPO2 Charles John Duran ng Manila Police District – Homicide Section, dakong 7:30 pm nitong  Huwebes nang maganap ang pananaksak sa loob ng bahay.

Napag-alaman, kadarating pa lamang mula sa pagtitinda ng biktima nang humingi ng pera ang suspek ngunit ayaw bigyan kaya nagalit at inagaw ang dalang bag ng babae.

Nang hindi makuha ang bag ay kumuha ng kutsilyo ang suspek at pinagsasaksak ang biktima saka mabilis na tumakas.

( LEONARD BASILIO )