HATAW! D'yaryo ng Bayan hatawtabloid.com
INIULAT ni Laguna PNP Provincial Director, P/Col. Rogarth Campo kay PRO-4A PNP Regional Director P/BGen. Antonio Yarra, ang pagkakadakip sa tatlong drug suspects sa magkahiwalay na anti-illegal drugs operation sa lalawigan ng Laguna nitong Sabado, 19 Marso.
Ayon sa impormasyon, isinumbong ng isang concerned tipster sa Biñan CPS na pinamumunuan ni P/Lt. Col. Jerry Corpuz, Officer-In-Charge na mayroong nagaganap na pot session sa Brgy. Canlalay.
Agad nagresponde ang Biñan CPS at naaresto dakong 10:20 pm ang mga suspek na kinilalang sina Denmark Gutib, alyas Denden, 41 anyos, driver, residente sa naturang barangay; at Dives Anabe, Jr., alyas Dave, 47 anyos, helper, residente sa Brgy. Southville, San Pedro, habang humihithit ng ilegal na droga sa loob ng isang barong-barong.
Nakompiska ng mga awtordidad mula sa mga suspek ang isang bukas na plastic sachet na naglalaman ng hinihinalang shabu residue, isang pirasong aluminum foil strip, isang pirasong nakarolyong aluminum foil tooter, at dalawang disposable lighter.
Gayondin, nasakote ng Calamba CPS sa ilalim ng direktang pangangasiwa ni P/Lt. Col. Arnel Pagulayan, chief of police, ang suspek na kinilalang si Jon Jon Garay, alyas Balot, 32 anyos, walang trabaho, residente sa Brgy. Parian, Calamba, dakong 7:01 pm kamakalawa sa Purok 7, sa nabanggit na barangay, matapos magbenta ng ilegal na droga sa police poseur buyer kapalit ng P500.
Nasamsam mula sa suspek ang apat na plastic sachet ng hinihinalang shabu na tinatayang may timbang na isang gramo at nagkakahalaga ng P6,800; isang coin purse na may lamang P400 na hinihinalang drug money, at P500 na ginamit bilang buy bust money.
Kasalukuyan nang nasa kustodiya ng pulisya ng kani-kanilang operating unit ang mga suspek at nakatakdang sampahan ng kasong paglabag sa RA 9165 o Comprehensive Dangerous Drug Act of 2002, at isusumite ang mga nakuhang ebidensiya sa Crime Laboratory Office para sa forensic examination.
Pahayag ni P/Col. Campo, “Pinupuri ko ang pagsisikap ng ating mga pulis sa Calamba CPS at Biñan CPS sa mga operasyong ito. Patuloy nating paiigtingin ang ating mga operasyon laban sa ilegal na droga upang mapuksa ang paglaganap nito sa lalawigan.” (BOY PALATINO)
