BINAWIAN ng buhay ang pitong indibiduwal matapos pagsasaksakin sa loob ng isang panaderya sa Purok Uno, Brgy. Cupang, sa lungsod ng Antipolo, nitong Martes, 22 Abril.
Kinompirma ni Rizal PPO Provincial Director P/Col. Felipe Maraggun na pawang mga empleyado ng panaderya ang pitong biktima.
Base sa paunang imbestigasyon ng pulisya, natagpuan ang wala nang buhay na mga katawan ng mga biktima dakong 6:00 ng umaga kahapon at iniulat sa pulisya dakong 8:00 ng umaga.
Samantala, agad sumuko ang suspek, empleyado rin ng panaderya, matapos ang insidente.
Ayon sa suspek, pinagpaplanohan ng kaniyang mga katrabaho na patayin siya kaya inunahan na niyang kitilin ang buhay nila habang nahihimbing sa tulog.
Dinala ang suspek sa Philippine National Police (PNP) Headquarters sa lungsod Quezon.
Patuloy ang imbestigasyon ng mga awtoridad kaugnay sa insidente ng pamamaslang. (BOY PALATINO)
