HATAW! D'yaryo ng Bayan hatawtabloid.com
MATAPOS ang dalawang taon, sa wakas ay naging Asian Tour champion si Wooyoung Cho ng South Korea.
Naglaro si Cho ng five-under par 67 sa huling araw at nanalo nang apat na palo sa 2026 Philippine Golf Championship na inorganisa ng Asian Tour at sinusuportahan ng Philippine Sports Commission.
Ginawa ang torneo kahapon, 8 Pebrero sa Wack Wack Golf and Country Club sa Mandaluyong City.
Ang 24-anyos na si Cho, naging propesyonal noong 2024, ay nagtapos na may kabuuang iskor na 11-under par o 277 matapos maipasok ang isang mahalagang 20-talampakang putt sa huling round.
“Ito ang una kong panalo sa labas ng South Korea at unang international tournament ko. Napakahalaga nito para sa akin,” sabi ni Cho, na dati nang dalawang beses nanalo sa Korean golf tour at may pangarap na makapaglaro sa US.
Ayon kay Cho, naging mahirap ang mental na bahagi ng laro pero sinikap niyang manatiling kalmado at mag-focus sa bawat tira para makakuha ng birdie.
Bukod sa tropeo, nakatanggap si Cho ng $90,000 na pangunahing premyo mula sa kabuuang $500,000 prize pool ng torneo.
Nakatanggap rin siya ng dagdag na $10,000 mula sa Wack Wack Golf bilang gantimpala sa pinakamababang iskor ng araw. Ang kanyang 67 ang pinakamababa niyang iskor sa buong torneo.
Sinimulan ni Cho ang huling araw na tabla sa ikalawang puwesto kasama ang ilang manlalaro, dalawang palo sa likod ng lider na si Karandeep Kochhar ng India.
Hindi maganda ang simula ni Kochhar matapos mag-double bogey sa unang butas, habang si Cho naman ay nag-bogey din ngunit mabilis na bumawi sa mga sumunod na butas.
Nagtapos si Pavit Tangkamolprasert ng Thailand sa ikalawang puwesto, sumunod si Travis Smyth ng Australia sa ikatlo, at pang-apat si Kochhar.
Si Keanu Jahns ang pinakamahusay na manlalarong Filipino sa torneo matapos magtapos na maitabla sa ika-9 hanggang ika-14 na puwesto at kumita ng $8,650. (PSC ICE/HNT)
