Murder suspect arestado

ISANG lalaking murder suspect ang nasakote ng mga awtoridad sa ikinasang follow-up operation sa bayan ng Victoria, lalawigan ng Laguna, nitong Linggo ng umaga, 18 Mayo.

Sa ulat kay Laguna PPO Provincial Director P/Col. Ricardo Dalmacia, kinilala ang suspek na si alyas Richie, residente sa Purok 4, Brgy. Masapang, sa nabanggit na bayan, at sinasabing pamangkin ng biktima.

Nakatanggap ng tawag ang Victoria MPS, na pinamumunuan ni P/Maj. Reden Valdez, dakong 5:10 ng umaga noong Linggo, mula sa isang tanod ng Brgy. Masapang kaugnay sa natagpuang katawan ng tao na duguan at wala nang buhay sa tabi ng kalsada.

Matapos nilang matanggap ang nasabing impormasyon, agad nagkasa ng follow-up operation ang mga tauhan ng naturang himpilan.

Agad nadakip ang suspek na itinuro ng isang nakasaksi sa insidente.

Narekober mula sa pag-iingat ng suspek ang isang kalibre .45 baril at mga bala.

Nahaharap ang suspek sa kasong murder at paglabag sa RA 10591 o Comprehensive Firearms and Ammunition Regulation Act in relation to Omnibus Election Code.

Ang naarestong suspek ay agad binasahan ng kanyang mga karapatan at kasalukuyang nasa kustodiya ng Victoria MPS habang inihahanda ang mga kaukulang dokumento sa pagsasampa ng kasong Murder.

“Sa pagkaaresto sa akusado ay tinitiyak namin sa biktima at kanyang pamilya na makakamit nila ang hustisya at mananagot sa batas ang taong ito,” pahayag ni P/Col. Dalmacia. (BOY PALATINO)