Ruru sa pagtatapat nila ni Dennis sa Urian: Inspirasyon at hindi kompetisyon

MA at PA
ni Rommel Placente

WAGI  si Ruru Madrid nang ma-nominate bilang Best Supporting Actor sa Metro Manila Film Festival 2024 at sa 8th EDDYS, para sa mahusay niyang pagganap sa  Green Bones.

Na-nominate rin siya sa 73rd FAMAS for Best Supporting Actor para rin sa nasabing pelikula, ‘yun nga lang, hindi siya pinalad magwagi.

Sa darating na Gawad Urian, na gaganapin sa October 11, nominado si Ruru para rin sa Green Bones. Pero hindi sa Best Supporting Actor kundi sa Best Actor.

Para sa Urian, sa tingin nila, gaya ni Dennis Trillo ay bida rin si Ruru sa Green Bones.

Isa si Dennis sa kalaban ni Ruru sa Best Actor category.

Sabi ni Ruru sa kanyang nominasyon sa Gawad Urian.

“Para sa akin, isang napakalaking biyaya at karangalan na maging nominado bilang Best Actor sa Gawad Urian.

“Lumaki akong humahanga sa mga haligi ng industriya tulad ni Kuya Dennis Trillo.

“Kaya napaka-surreal na ngayong pagkakataon na magkatapat kami sa parehong kategorya.

“Hindi ko ito tinitingnan bilang kompetisyon, kundi bilang inspirasyon.

“Patunay ito na kahit nagsimula ako bilang underdog, sa sipag, panalangin at tiwala sa proseso, posible pala na makarating ka sa antas na dati ay pinapangarap mo lang,” sabi pa ni Ruru.