HATAW! D'yaryo ng Bayan hatawtabloid.com
NANINIWALA si Philippine Tobacco Institute (PTI) President Jericho Nograles na kailangang bumuo ang pamahalaan ng isang ahensiya o departamentong tututok sa illicit trade sa bansa upang masawata ang pagkalat nito partikular sa tobacco industry.
Ayon kay Nograles, sa sandaling magkaroon nito ay tiyak na may tututok sa paghuli, pagsasampa, at pagproseso ng mga kaso hanggang maipakulong nang tuluyan ang mga tao o sindikatong sangkot dito.
Aminado si Nograles na halos 30 porsiyento ang nawawala sa mga tobacco companies kada taon dahil sa sistema ng illicit trade.
Binigyang-linaw ni Nograles na suportado niya ang nagiging hakbangin ng pamahalaan ukol sa pagsugpo ng illicit trade ngunit kulang pa ang nakukulong at nahahatulan dito nang sa ganoon ay magkaroon ng takot ang sindikato na pumasok sa ganitong gawain.
Samantala, sinabi ni Bureau of Internal Revenue (BIR) Commissioner Romeo Lumagui, Jr., bilyong piso ang nawawala sa koleksiyon sa excise tax ng pamahalaan dahil sa illicit trade.
Aminado si Lumagui na dahil sa illicit trade ay nababawasan ang pondong nailalaan sana ng pamahalaan sa sektor ng edukasyon at kalusugan.
Ani Lumagui, hindi lang naman sa Filipinas may ganitong problema ngunit hindi ito kokonsintihin ng ating pamahalaan.
Tiniyak ni Lumagui na hindi nila tatantanan ang pagsasagawa ng raid sa maiuulat na mga produktong bahagi ng illicit trade lalo sa sektor ng Tobacco lalo na’t natuklasan pa nila na kahit bahay lamang ay ginagawang bodega para lamang sa mga maling gawain.
Kaugnay nito, pinayohan ni Rohan Pike, managing director ng Rohan Pike Consulting na kinakailangan magkaroon ng mas maganda at maayos na polisiya ang pamahalaang Filipinas upang labanan ang naturang mga ilegal na gawain.
Aminado si Pike na malaking factor talaga ang talamak na korupsiyon upang tuluyang mabigo ng pamahalaan at masawata ang mga illicit trade.
Ani Pike, panahon na upang mamulat ang kaisipan ng bawat isa na huwag tangkilikin ang mga produkto na mula sa illicit trade.
Naniniwala si Pike na malaki ang epekto ng mga illicit trade sa mga negosyante ngunit may epekto rin ito sa imahen ng isang bansa. (NIÑO ACLAN)
