Bong nawalan ng ‘nanay’ sa pagpanaw ni Manay Lolit

MA at PA
ni Rommel Placente

ISA ang dating senador Bong Revilla sa bumisita sa burol ni Manay Lolit Solis. Bukod kasi sa isa siya sa mga alaga ng namayapang talent manager, sobrang malapit ang una sa huli na itinuturing niyang parang isang tunay na ina.

Kaya nang kamustahin si Bong kung anong pakiramdam na sumakabilang-buhay na ang kanyang manager, sagot niya, “I can’t say naman na I’m okay, trying to be okay. ‘Yan ang buhay. Kaila­ngan move on tayo. Chapter ng buhay ‘yan, kasama si Nanay Lolit. Buksan naman natin, bagong chapter ng buhay natin.

“But, siyempre lahat naman tayo nagluluksa dahil sa pagkawala ni Nanay Lolit. Hindi lang ako nawalan ng manager kundi nawalan ako ng para kong nanay, so, mabigat sa dibdib. 

“Sa rami ng mga pinagdaanan ko, siya ‘yung tagapagtanggol ko, siya ‘yung nagpapalakas ng loob sa akin, siya ‘yung mga nag-a-advise sa ’kin kung paano maging matatag. Pero ganoon pa man, nagpapasalamat ako sa kanya. Ang laki ng hirap niya sa akin,” sabi ni Bong.

Sa tanong naman kung may pagkakataon na nag-away sila ni Manay Lolit, ang sabi niya, “No, never naman. Wala akong natandaan. Pinagagalitan niya ako kapag natsitsismis ako. Siyempre ipinagtatanggol niya si Lani (Mercado, misis niya).”