HATAW! D'yaryo ng Bayan hatawtabloid.com
HINDI napigilan ni Mayor Nancy Binay ang mapaluha habang siya ay nagsasalita sa unang araw at kauna-unahang pagdalo sa flag ceremony ng mga opisyal at empleyado ng lungsod ng Makati.
Ayon kay Binay ang 7 Hulyo ang isa sa pinaka-espesyal na araw para sa kanya dahil ito ang kanyang kauna-unahang pagdalo sa flag ceremony bilang punong lungsod ng Makati.
Kaya hindi niya naitagong bumati ng magandang umagang “Be Nice” ang kanyang palaging salubong noong siya ay tumatakbong alkalde.
Nagpapasalamat si Binay sa lahat ng mga opisyal at empleyado ng lungsod na nakiisa sa flag ceremony.
Nanindigan si Binay na ang pagtataas ng watawat ng Filipinas ay sumasalamin sa kanilang pagkakaisa bilang isang bansa, isang Makati at isang pangarap.
Aminado si Binay na bagamat sila ay galing sa iba’t ibang paniniwala at emosyon, iisa ang kanilang naisin — ang paglingkuran ang bawat mamamayan ng Makati upang lalo pang umulad ang lungsod.
Dahil dito hiniling ni Binay sa bawat opisyal at empleyado ng Makati na maging kasama at kaisa niya sa paglilingkod para sa higit na pag-unlad ng Makati.
Naniniwala si Binay na hindi lamang siya ang nagpapatakbo ng lungsod kundi ang bawat isang opisyal at empleyado nito.
Paalala ni Binay, bawat isa ay may kanya-kanyang tungkulin na dapat gampanan at mahalaga ang papel para sa paglilingkod sa bawat mamamayan at patuloy na pag-unlad ng lungsod.
Hiling ni Binay sa bawat isa na magtulungan sila para sa isang mas maganda, mas maunlad at higit sa lahat ay “The Best” na Makati.
Ayon kay Binay, araw-araw na sisikapin niyang magkaisa kaysa magkawatak-watak; at ang pag-unlad kaysa pamomolitika.
Tiniyak niya ang serbisyong may kalidad, serbisyong Makati at serbisyong Binay.
Sa huli, ipinaalala ni Binay sa bawat isa ang palagiang sinasabi ng kanyang ama na si dating Vice President at Makati Mayor Jejomar Binay — “Makati Mahalin Natin, Atin Ito.” (NIÑO ACLAN)
