Mga nagwaging artista sa nakaraang eleksiyon nag-report na

PUSH NA’YAN
ni Ambet Nabus

NAGSIMULA nang mag-report nitong Lunes, June 30, sa kani-kanilang mga opisina ang mga celebrity-politician na nanalo last elections. Ito nga ‘yung turn-over ceremony nila na siyempre pa ay nagdulot ng bagong excitement sa kanilang mga constituent.

Sa mga respective social media account nila ay nakita natin ang muling paglibot ni Yorme Isko Moreno sa kanyang Manila City Hall office na ipinakita ngang ‘back-to-zero’ ang office na mayroon lang mga mesa at upuan. 

Si Bulacan Governor Daniel Fernando ay simpleng nagdagdag at nagbawas lang ng ilang mga gamit sa office nito lalo na’t ‘yung wala sa “feng shui.”

Sinamahan naman ang mahal nating si Batangas Governor Vilma Santos ng mga anak na sina Luis Manzano at Lipa District Congressman Ryan Christian sa pagtuntong niyong muli sa Kapitolyo ng Batangas.

Nakita rin namin ang post ni QC Councilor Aiko Melendez, na bilang nahalal na number one Councilor sa distrito niya ay nangakong mas dodoblehin ang oras para sa nasasakupan niya.

Si Pasig City Mayor Vico Sotto naman ay nagpahayag na wala siyang balak na tumakbo sa mas mataas na posisyon come 2028 dahil last term na niya ngayon bilang mayor at trabaho para sa Pasig ang kanyang focus.

So far ay perfect attendance naman ang karamihan sa mga celebrity-politician  natin sa kanilang turn-over ceremony gaya nina Alfred Vargas, Sol Aragones, Lucy Torres, Richard Gomez, among others.