PUSH NA’YAN
ni Ambet Nabus
KAHIT si Dingdong Dantes ay balitang nag-react din sa eskandalosong mga statement ni Alvin Aragon, ang asawa ni dating Sexbomb Izzy Trazona.
Bagamat walang mga salita sa kanyang post bilang reaksiyon sa pagkukompara ni Alvin kina Aljur Abrenica at Paolo Contis, napansin ng netizen ang nasabing post ng kilalang aktor-host.
Nauna na nga riyan ang mga pahayag nina Rica Peralejo, Sue Ramirez, Mikoy Morales, at IC Mendoza at iba pang vloggers/socmed influencers sa tila “pabibo” at super self-righteous remarks ng dating Starstruck contestant.
Ngayon nga’y naglalabasan din ang mga post ni Michael Navarro, ang biological father ni Andrei aka Sofia Trazona, na apparently pala ay isa sa mga choreographer ng Sexbomb reunion concerts.
Hayun tuloy, naglabasan ang mga haka-haka na kaya umano hindi pinayagan ni Alvin si Izzy na maka-join sa reunion ng Sexbomb ay dahil malamang na insecure pa ito sa dating karelasyon ng asawa niya.
At dahil bongga ang suporta nito sa transman na anak, sinasabing ‘sampal’ kay Alvin ang bigo nitong pagpapa-alala sa stepson na bawal sa langit ang ‘homosexual.’
Nakalolokang mga pangyayari, pero ang lahat ng iyan ay nang dahil lang sa tinatamasang bagong kasikatan ng Sexbomb na may mga naka-line up na ngang shows abroad soon.
Sino nga kaya ang higit na kumikita sa mga usaping ito ha, mga ka-Hataw?
