HATAW! D'yaryo ng Bayan hatawtabloid.com
PUSH NA’YAN
ni Ambet Nabus
UY, ibang klaseng Jodi Sta. Maria ang mapapanood sa Untold na showing na ngayon sa mga sinehan.
Nagtataka nga kami kung bakit hindi ito napasama sa 2024 MMFF entries gayung ‘di hamak naman ang pagka-disente ng pagkakagawa nito ni direk Derick Cabrido kompara roon sa award-winning horror entry na nang-iinsulto sa kamalayan ng mga manonood hahaha!
Anyway, ang updated script ang isa sa mga nagdala ng Untold. Kuhang-kuha kasi nito ang boomers at gen z, na pati ang lengguwahe at humor ay swak na swak. Ang totoo naman kasing pakiramdam kapag nanonood ka ng isang horror flick ay ‘yung pagtatawanan mo ang iyong sarili after mong magulat, masindak, sumigaw, at tumili sa mga eksenang pinanonood mo.
Ganoon ang sangkap ng Untold kaya masarap itong panoorin.
Then there was the genius of Jodi na napakahusay naman talagang gumanap.
Napaghahalo niya ang drama at comedy, ang empathy at inis, ang takot at tapang sa kanyang mga mata at body movement.
Naku, basta manood na lang po kayo. Ito ang isang horror movie na hindi ninyo pagsisisihang mapanood dahil sabi nga namin, hindi kayo iniinsulto bilang manonood.
Ang maganda pang balita, ang Regal Films na siyang nag-produce ng movie ay nagawang makipag-bargain sa mga SM theater dahil ang laki ng discount na ibibigay nito sa mga student watcher. Just bring lang your ID at hayun makaka-discount ka na.
Siyempre ‘yung mga senior citizen at PWD ay kasama rin.
Bukod kay Jodi, nasa movie rin sina Joem Bascon, Lianne Valentin, Kaori Oinuma, at ang bonggang Miss U, Gloria Diaz.
Showing po ang Untold nationwide!
