Inigo inamin ‘di kayang tapatan nagawa at kontribusyon ng amang si Piolo sa entertainment industry

MA at PA
ni Rommel Placente

SA guesting ni Inigo Pascual sa Fast Talk with Boy Abunda, natanong siya ni Boy Abunda kung  anong napi-feel niya kapag ikinukompara siya sa amang si Piolo Pascual.

Sinasabi kasi ng iba, na mas guwapo at mas magaling sa kanya si Piolo.

Sagot ni inigo, never naman siyang na-offend o nagalit sa nagkukompara sa kanilang mag-ama, kahit minsan ay  offensive pa ang mga sinasabi ng netizens.

“Para sa ‘kin hindi ko siya matatanggal sa buhay ko, sa pagkatao ko, kung sino ako. Kasi wala naman ako sa mundong ‘to kung wala ‘yung tatay ko, magulang ko,” sabi ni Iñigo.

Dagdag pa niya, “Para sa ‘kin hindi siya obstacle, hindi siya problema kasi wala naman ako sa industriyang ‘to kung wala rin naman ‘yung tatay ko.

“Para sa ‘kin it’s an honor that I get, it’s an honor to be compared to my dad,” sabi pa ni Inigo.

Aminado si Inigo na hindi rin siya sigurado kung matatapatan o malalagpasan niya ang nagawa at mga kontribusyon ng ama sa entertainment industry.

At tanggap na rin niya na mas guwapo ang kanyang tatay kaysa kanya.

“Sa mga kaibigan ko, mas ipinagmamalaki ko pa si Papa na parang, ‘Ito ‘yung tatay ko. Can you believe it? This is my dad. He looks like my older brother.’

“For me that’s more of a bragging right,” aniya pa.